Hreiðurgerð

Enn styttist í stelpuna.
Er byrjuð að hamast í undirbúning og finnst ég þurfa að gera ansi margt en er að hugsa um að reyna að takmarka mig svo ég ofgeri mér ekki.
Gerði mér lítið fyrir í gær eftir heilan vinnudag og ryksugaði og skúraði allt húsið svaka vel, svo ég geti látið Bubba skúra rétt f. settan dag, þar sem ég veit að hann skúrar ekki sérlega vel, mun það skipta minna máli þar sem ég hef tekið þetta svona vel núna...

Svo langar mig að taka skápana, mála baðið, henda úr skúrnum, fara með bílinn minn í skoðun, gelda köttinn og svo á ég eftir að þvo barnafötin, redda mér skiptiborði, skiptitösku og kaupa ýmislegt smálegt eins og snuddur og fl.
Ég á líka eftir að finna barnapíutæki, langar í brjóstapúða, sling eða moby wrap (sem ég er samt ekki svo viss um að ég myndi nota mikið...og því spurning hvort ég fái mér slíkt), brjóstapumpu, vantar útigalla og myndi vilja kerrupoka...

En krílið kemur nú víst hvort sem allt þetta verður komið eða ekki. Geri mér líka grein fyrir að það sem það þarfnast mest getum við Bubbi séð um að skaffa sjálf, mjólk (fellur meira í minn hlut;) og hlýju :)

Aftur á móti er nú líka margt komið.
Er komin með vöggu, sæng, 1 rúmföt (kannski gott að eiga önnur til skiptanna) slatta af láns og keyptum fötum, taubleyjur (ætla samt að nota bréfbleyjur...) bílstól, hókus pókus stól , vagn og gamlan maxi cosy stól sem Lea var í, sem er alveg fínn.

Erum búin að mæta 1 sinni í fæðingarfræðslu og förum aftur næsta þriðjudag, Þá verður fæðingardeildin á Lansanum skoðuð. Förum líka á parakvöld í jóganu þar sem ég vona að Bubba verði kennd nokkur góð nudd-trikk svo hann verði að sem mestu gagni í fæðingunni :)

Einnig er búið að panta f. köttinn í geldingu á þriðjud. Er ekki að nenna annari holskeflu af kettlingum eins og hefur verið hér á heimilinu síðustu 2 vor.

31 vika og verslunarmannahelgin

Jæja, hér eru 2 myndir af mér komin 31 viku, þá eru bara 9 eftir (fyrir þá sem eru ekki alveg inn í þessari talningu;)

Og fyrir neðan eru 2 myndir frá verslunarmannahelginni. Vorum á Flúðum og það var voða huggulegt.

Á traktora-torfærunni.

Góður eftirréttur :)

bráðum 32 vikur og Bubbi 32 ára í dag.

Sælt veri fólkið.
Dalvík var ágæt- fiskisúpan á föstud.kvöldinu var rosa skemmtileg. Gaman að smakka mismunandi súpura og bera saman.
Fólk hefur lagt ótrúlega mikið upp úr skreytingum í kringum húsin sín og ég sá ekki eitt ljótt hús í niðurníslu (er ð í því?). Alveg ótrúlegt hvað öllu er haldið vel við. Sá einn ljótan lágan steyptan kant með flagnaðri málningu v. hús (sem leit annars mjög vel út) - það var allt og sumt!
Bryggjufjörið á laugard. var líka fínt, þá gekk maður á milli bása og át á sig gat.
Fór m. mömmu á handverkssýninguna inn í Hrafnagili á föstud. Margt mjög fallegt þar, keypti samt bara krem á bumbuna - bumbugaldur til varnar sliti.

Annars á ég líka 2 teg af bumbukremi sem Anna gaf mér og ég nota nískulega því þau eru rándýr (hef t.d. séð verðið 3100 á Weleda olíunni í Lyfju!!) en ég nota eitthvað á hverjum degi og vona að það komi ekki slit.
Ólöf Jóna horfði með hrylling á mig um daginn þegar ég hafði útskýrt tilgang þessara krema (nú barnið spurði...) og sá líklega f. sér að maginn gæti slitnað og allt hrunið út. Varð að útskýra betur svo hún fengi nú ekki martraðir blessað barnið:)
"það getur komið slit á magann" hljómar líklega ekki vel þegar maður veit enn ekkert um slit og appelsínuhúð haha.

Bubbi á afmæli í dag og ég ætlaði ekki að gefa honum neitt, enn fúl yfir að hann klikkaði á afmælisgjöf f. mig, en gaf mér þó blóm... (ég vil helst fá gjöf um leið og ég vakna)
En fór þó af stað í fyrradag og ætlaði að skreppa í hád. íElko og kaupa DVD handa honum. Hann var líka að fá rafsuðu um daginn sem átti að vera afmælisgjöfin í ár.
Á leiðinni í Elko ákvað ég að kaupa íslenska GPS kortið handa honum því við eigum tækið. Þegar í Elko var komið greip mig eitthvað rugl og ég keypti plasma skjá f. vel á annað hundraðið...
Var kannski "aðeins" að hugsa um sjálfa mig líka en ég þarf nú að hafa þokkalegt sjónvarp í fæðingarorlofinu...
Hann hefur allavega aldrei verið eins ánægður með neina afmælisgjöf enda eins gott:)
(hálsmen, fatnaður og þvíumlíkt hefur ekki fallið í kramið á fyrri afmælum)

Heilsan er fín, finn samt vel f. bjúg, soldið f. brjóstsviða og næturklósettferðum. Get ekki legið lengur með góðu móti í Lazy-boyinum f. framan sjónvarpið því þá næ ég ekki almennilega andanum. Get ekki gengið hraðar en snigill liggur við nema fá samdráttarverki. En þetta styttist, það eru góðu fréttirnar. Stelpan virðist hraust og finnst oft gaman að hamast á nóttunni. tvisvar hef ég fundið hiksta. Frekar fyndið:)
set inn bumbumynd fljótlega.

Fékk pakka alla leið frá Suður Afríku í morgun, með 2 samfellum frá Lilju, konu Þórarins. Takk fyrir það. Alltaf gaman að fá sendingar:) Á þeirri minni stendur "worth the wait" -hrikalega sætt.

Ferðalög og kvart

Erum á milli ferðalaga. Komum frá Flúðum í gærkvöldi og förum á Dalvík á miðvikudag. Bubbi myndi vilja leggja af stað strax á morgun en ég vil vinna smá á miðv.deginum. Ætla að rukka fólk á Grand fyrir val-ferðir og svona. Og komast aðeins niður úr e-mail bunkanum sem hefur örugglega hlaðist upp yfir helgina. Var að drukkna í e-mailum í síðustu viku. Einn daginn bárust rúmlega 40 og næsta dag komu c.a. 30-35. Finnst það fullmikið, miðað við að það þarf að svara þeim flestum.
En í sambandi við fríið í næstu viku, að þá hugsaði ég nú sem svo að hinir geta líka bara reddað því ef eitthvað kemur upp í samb. við mína hópa. -Sem verður náttúrulega pottþétt eitthvað, en ég er að meina að maður er ekkert ómissandi.

Já og þetta með Dalvík, verð að viðurkenna að ég er ekkert yfir mig spennt...
Þetta verður kraðak dauðans þar sem allir eru í einni kös að éta fiskisúpu heima hjá ókunnugu fólki. Veit að fólkið sem við parkerum hjá (þau ætla að taka frá fyrir okkur stæði) finnst gaman að drekka (eins og líklega flestu fólki sem er í útilegu og er ekki ólétt) og ég nenni því ekki.

En upp með bjartsýnina og gleðina. Má þakka fyrir að fara í ferðalag og fá soldið frí.

Væri samt spenntari að vera á einhverjum rólegri stað þar sem maður kemst í sund ef manni langar.

Þurfum að kaupa nýja dýnu því ég get ekki sofið lengur á dýnudraslinu sem fylgdi campernum í fyrra. Vegna aukinnar þyngdar er ég farin að sofa á spýtunni nánast, þar sem dýnan pressast bara saman í ekkert.

Það sem hefur verið á döfinni í sumar.

Jæja, hér eru nokkrar myndir frá sumrinu.

Kíkti í heimsókn til Dk í júní.

Hér má sjá Önnu og Úlfhildi litlu (yngstu hennar Önnu). Við vorum staddar í HM

Svo er hér ein af Helle, við fórum líka í HM :)

Mamma útkskrifaðist úr Fjölbrautarskólanum Hraðbraut. Hún dúxaði í sögu og þýsku og var líka efst á sinni braut (málabraut). Ótrúlega flottur árangur. Fyrri myndin er af þeim mömmu, Diddu frænku (sem nú er komin á Sólvang) og Stefaníu systur mömmu. Svo er mynd af mömmu að taka við viðurkenninum f. námsárangurinn.

Til hægri er mynd af okkur Bubba þar sem við stöndum við Seljalandsfoss. Mjög fín mynd verð ég að segja -enda fallegt fólk á ferð:)

Núna í júlí var ættarmót haldið á Snæfellsnesi. Niðjar Cýrusar langafa og Sigurrósar langömmu. S.s. ættin hans Hansa afa. Þetta var mjög fín ferð og veðrið var alveg frábært. Húðin er enn að flettast af Bubba eftir sólbrunann. Klikkaði alveg á kremunum -skil ekkert í mér. Í scrabble kynntist ég nýrri hlið á Bjögga frænda en hann var svo tapsár að hann falsaði stigatölurnar og olli þvílíkum ruglingi að við Bubbi fórum að þrasa síðar um kvöldið þegar ég var að fara yfir stigin og úrslitin... (spilamynd: Birna Rún-Stjáni- og Vestmannaeyjarfólkið Silja og Hansi

Við þurftum að bíða talsvert eftir matnum... Það líkaði okkur ekki. Það var svona sameiginlegur matur. Og sósan var skömmtuð MJÖG naumlega -við litlar vinsældir. En kjötið var gott. Er s.s ekki mikill aðdáandi sameiginlegs matar. Fyrir ofan er Bjöggi með niðjatalið góða og veitingar frá móður sinni ásamt sinni indælu unnustu Hrafnhildi.

Ólöf Jóna er orðin 6 ára og svo stór. Hef bara notað videovélina og filmuvélina í afmælinu hennar, svo engar verða afmælismyndirnar hér. Hún fékk fjórhjól (hvorki meira né minna) frá okkur í afmælisgjöf og hér er mynd af henni að spæna upp í námu hjá pabba sínum. (tek fram að ég var ekki með í för, enda hefði ég farið nær barninu -Bubbi er meira í því að taka svona "yfirlitsmyndir" :) Tek fram að Bubbi gat skrúfað niður bensíngjöfina svo hún kemst ekki upp úr fyrsta gír. Svo verður losað um með tímanum eftir því sem öryggisfatnaður og færni bætist við

Um daginn var 2 boðið frá GJ í dagsferð á Austfirði í kynnisferð. Það var æðisleg ferð. Gott veður og ég kom heim með fína steina og sæt barnaföt:)

Í lokin er hér mynd af mér komin 26 vikur rétt eftir afmælið mitt. (er reyndar komin 28 vikur núna - og svei mér þá ef bumban hefur ekki stækkað enn meir)

Heilmikið ferðalag í dag.

Fór í dagsferð austur á firði í dag í boði Flugleiða og Tanni travel sem er ferðaþjónusta f. austan.
Þetta var voða fjör. Flugum frá RVK kl 8 til Egilsstaða og þaðan keyrðum við beint í Álverið á Reyðarfirði að fá lánaða hjálma, stoppuðum á flottum útsýnisstað v. Eskifjörð, keyrðum þaðan í gegnum Eskifjörð -þar sem mér tókst að láta smárútuna snúa við þegar ég áttaði mig á því að ég myndi ekki meika meira ferðalag nema komast á klóið. Þá var kl. um 10:30 og ég held að allar í rútunni (vorum 12) hafi verið dauðfegnar því rútan tæmdist við sjoppuna og allir komu út með ísa, nammi og fl. enda vorum við í ferðalagi og þá þarf maður sjoppumat!! það vita allir nema bíljstjórinn og guide-inn í ferðinni greinilega.
Já, svo fórum við upp í Helgustaðanámu sem er út með firði og gengum svolítið upp í fjall og þaðan inn í silfurbergsnámu. Alveg svakalega flott. Tók nokkra steina þaðan, þorði samt bara að taka 3 frekar litla því bílstýran var nýbúin að banna 12 ára stelpu sem var með í för að taka svo mikið sem pínu steinvölu. Því ef allir tækju stein að þá yrði ekkert eftir...
Það kom sér vel að hafa hjálmana í göngunum, því stundum lækkaði loftið svo mikið og ekki var skyggnið gott þarna inni. Keyrðum svo aftur inn á Eskifjörð þar sem við eyddum deginum
Fórum í Sjóhúsið og fengum fiskisúpu og fleira gott eftir að hafa fengið kynningu á starfseminni á meðan naslaður var harðfiskur, hákarl og brennivín (át mest af harðfiski en tókst að borða 1 hákarlsbita, var ánægð með það:)
Svo fórum við í siglingu á litlum bát um fjörðinn og þvínæst á sjóminjasafnið sem sýndi reyndar líka ýmsa aðra flotta hluti ótengda sjómennsku.
Næst fórum við að skoða Steinasafn Sören og Sigurborgar en þar býr ekkja sem á 2 hæða einbýlishús og neðri hæðin er undirlögð undir stórglæsilegt steinasafn og á efri hæðinni býr hún í algjörlega ofhlaðinni íbúð hvað varðar skraut og glingur. Það sá nánast hvergi í auðan blett. -nema kannski helst í loftinu sjálfu. Ég hugsaði: " þvílík vinna sem þetta verður f. ættingja hennar þegar hún fellur frá" og " Sjitt, ef það kæmi góður jarðskjálfti hérna..."
Hún var ægilega indæl og bauð okkur svo upp í ekta kaffiboð með flatkökum m. hangikjöti og kleinum og sigmundi í sparifötunum.
það sem mér fannst merkilegast er að enginn fór úr skónum nema ég, guide-inn og ein önnur stelpa. Konan var með teppi á gólfinu í stofunni og öllum fannst bara sjálfsagt að vaða inn á skónum!!!
Er þakklát fyrir gott uppeldi. Í kveðjugjöf máttum við velja slípaðan stein úr skál, og ég fékk mér okkurgulan jaspis. Ægilega fínn:)
Að lokum stoppuðum við í Eskju sem er Bókabúðin (með stóru B-i) þetta var svona Kaupfélag þar sem ALLT er til.
Keypti agalega sætan galla með kisumynstri(eitthvað voða gott danskt merki víst- man nú ekki nafnið) og lambhúshettu sem stelpan getur notað fljótlega eftir fæðingu. enda fæðist hún í okt. svo ekki veitir af hlýjum fatnaði.
Keypti prjónaða ullarvettlinga á mig á 1000 kall - það fannst mér gott verð.
Svo var brunað á flugvöllinn og nú er ég loks komin heim og er að leka úr þreytu.
En þarf að undirbúa ferð á ættarmótið sem haldið verður á Snæfellsnesi á morgun.

já og ein frétt að lokum: erum komin með kisuhró sem vældi heil ósköp fyrst, þar sem hún var alltaf að leita að kettlingunum sínum en nú er hún orðin fín:) Sigrún ættleiddi okkur að henni þar sem stelpan hennar er með kattaofnæmi. Það er góð húshjálp að hafa kött, þá koma aðrir kettir ekki inn óboðnir, köngulóarfarganið á pallinum minnkar, ekki er skitið í garðinn af öðrum köttum og fugladrit er úr sögunni. (ekki að það hafi verið mikið vandamál, en það var þó drit á grillinu um daginn...)

Meira af ísraelunum.

Þetta er nú alveg bráðfyndið dæmi.
Í dag hringdi guide-inn þeirra og sagði frá því að í hópnum væri fólk sem hefði kynnst á internetinu og hefði pantað 9 daga ferð saman til Íslands í twin herb.
Það hefur komið á daginn eftir 2 nætur að þau þola ekki hvort annað:D Þvílík viska!!

Þannig að ég er búin að senda mail á öll hótelin og ath. hvort þau geti fengið 2 sgl herb. í stað 1 twin.
Skemmst frá því að segja það gengur ekki alls staðar.
Mér finnst þetta frekar fyndið. Og svo koma smá aldursfordómar í lokin:
Hann er 29 ára, hún er 62 ára. Jebb:D

Já og svo verð ég nú að monta mig af því að í gær fór ég alein út á flugvöll að sækja 4 frakka og keyrði líka smárútuna og nýtti þar með meiraprófið mitt loksins (nýtti það nú reyndar aðeins í kringum áramótin -janúar þegar ég keyrði trukkinn)
Þetta var bara mjög gaman.

Hef komist að því að ísraelar eru klikkaðir.

Vinnan hefur verið alveg snargeðveik undanfarna daga en ég er vonandi að sjá fram úr þessu á næstu dögum. Núna eru sko að koma 5 hópar sem ég undirbý með því að panta mat fyrir þau, afþreyjingar, rútur, hótel og bara allt sem þessu fólki dettur í hug að gera.
Auðvitað er þetta mjög skemmtileg vinna en það er misjafn sauður í mörgu fé (mikið er ég viss um að ég sé að fara vitlaust með þetta orðatiltæki...) en það eru þessir árans Ísraelar sem eru algjörlega alla að drepa. Þvílíkt fólk.
Þeir eru alltaf að reyna að komast lengra en hægt er. Reyna að troða fleiri nöfnum á lokanafnalista, reyna að fá meira út úr ferðinni en þeir tímdu að borga fyrir, láta sem ekkert sé þó að þeir bæti 2 nýjum nöfnum á lokanafnalista sem þegar hefur verið sendur á hótelin þannig að maður þarf að hafa samband við 8 hótel (hópurinn fer hringferð og gistir út um allt land) til að athuga hvort að það sé í alvöru laust f. hjón, 3 dögum áður en hópurinn mætir til landsins.
Þeir eru að gera mig geðveika!!!
Eins og það liggi bara aukaherbergi út um allt land á mesta háannatímanum.
Og ég er að segja ykkur það- ein ferðaskrifstofan sem hringdi í dag alveg brjáluð af því að hópur frá þeim átti bara að fá klst. langa skoðunarferð um Rvk í rútu í stað 3 klst. ferðar -af því að hún hafði verið tekin út þar sem þeir vildu lækka verðið á ferðinni (það er ekki eins og það hafi ekki verið margtekið fram í mörgum e-mailum að þetta yrði 1 klst ferð) -Þeir eiga eftir að verða hundfúlir og fetta fingur út í það hvað þessir skoðunarferð kosti svo mikið. Og eiga eftir að reyna að fá hana ódýrari.
Vá hvað þau gerðu mig reiða í dag, og ég er aftur orðin æst.

En jæja, best að reyna að hugsa um eitthvað annað.
Mamma er að útskrifast úr hraðbraut á morgun sem stúdent. Þá getur hún farið í háskólann næsta haust. Hún hefur rétt svo verið að missa glóruna þarna því hún gerir svo miklar kröfur til sín og vill alltaf fá voða góðar einkunnir. Sem er svosem gott og blessað. En þetta er góður áfangi og ég óska henni til hamingju með þetta.
Hún fer svo til Þýskalands í næstu viku á formúluna í Hochenheim.

Jæja, ætla að fara að sofa og hugsa hlýlegar hugsanir til leiðsögumanns-greysins sem þarf að hírast með þessum ísraelum næstu vikuna. Heyrði í honum síðast um 6 leytið og hann er hálfsmeykur.

3D sónar

Jæja, þá fórum við loksins í þennan þrívíddar og fjórvíddarsónar eða 4D sem er eiginlega bara margar myndir teknar í röð og svo raðað saman, svo spilast þetta hratt þannig að það kemur út eins og stutt myndskeið, kann bara því miður ekki að setja það inn hérna svo myndirnar verða að duga)

Það var mjög gaman að fá að sjá dömuna. Maður gat séð andlitsdrætti og alltsaman. Hún kúrði sig nú ansi mikið upp að naflastrengnum til að byrja með og vildi helst ekki sleppa honum en eftir að "ljósmyndarinn" hafði ýtt og djöflast á kúlunni sleppti hún loks strengnum og sýndi sig betur en þá með þótta og pirringssvip. Setti hreinlega í brýrnar. Hefur líklega fundist þetta óþarfa læti. Hún var annars rosalega spræk og stoppaði ekki allan tímann.

Og auðvitað er þetta fallegasta barn sem til hefur verið;)

Mér finnst nafnið sem við höfum ákveðið passa enn betur við hana eftir að hafa séð hana:) En það kemur allt saman betur í ljós seinna.

Hérna er hún að hjúfra sig upp að naflastrengnum

Hér er konan búin að hamast á bumbunni og raska rónni heldur betur. Eins og stelpan sé frekar örg yfir þessu ónæði bara.

Hérna er brúnin aðeins að léttast aftur. Greinilega ekkert voðalega langrækin:)


Hér er hægt að sjá pjásuna og fæturna

Fyrir ofan: Aðeins að nudda augun. Hægt er að sjá að hún er einungis með 5 fingur á hendinni þannig að ekki erfir hún þá bæklun frá mér;) (á maganum hringast naflastrengurinn)

Fyrir neðan: að sitja fyrir á mynd.

Á myndum setur maður stút á varirnar:)

Átti erfitt með að velja úr þannig að ég setti bara nokkrar. Konan sagði að hún væri bara óvenju vel á sig komin m.v. ekki lengri meðgöngu, oft eru þau víst svo horuð á þessum tíma en þessi er víst bara nokkuð vel haldin. Vona nú samt að hún verði ekki eins og pabbi sinn.

Mest lítið að frétta.

Fór í mæðraskoðun í gær og allt leit vel út. Er komin 24 vikur í dag og þá eru 16 eftir, 112 dagar...
Byrjaði líka í meðgöngujóga í gær. Kom mér á óvart hvað ég var stirð, en ég gat næstum ekki sumar einfaldar æfingar sem ég gat auðveldlega í haust. Svakalega var ég stirð. Þessi fótur (eða taug) er soldið að stríða mér. Ljósan sagði að þetta væri líklega v. þess að nú er grindin komin á hreyfingu og er líklega að þrýsta á e-a taug sem liggur frá baki niður í fót, það útskýrir þennan kjána"gang" í mér:)

Hér verður afmælisveisla næstu helgi. Ekki koma nú margir, fólk er allt í fríi um hvippinn og hvappinn. Þetta verður þá bara fámennt og gott. Ætlum að halda upp á 6 ára afmæli Ólafar Jónu með pulsu og ísáti og henda krökkunum í pottinn. Hef ekki séð hana í heilan mánuð en hún kom hérna síðast á meðan ég var úti. Ætli hún sé ekki vaxin upp úr þessum fötum sem ég keypti á hana:)

Set kannski bráðlega inn einhverjar myndir, það er svo leiðinlegt að skoða blogg án mynda.

Afmæli í dag:)

Ég á afmæli í dag:D Er bara að taka því rólega heima og raða smátt og smátt inn í stofuna aftur eftir að nýja parketið kom. Er bara óvenju róleg yfir því að eiga afmæli og var bara "næstum því" farin að grenja í morgun- en gerði það ekki -jei fyrir mér:), en ég fæ alltaf einhvern svona amælisblús, veit ekki alveg afhverju, líklega v. þess að þetta er bara ekki eins merkilegur dagur og þegar maður var lítill. Á bara eitthvað erfitt með að aðlagast því. En ákvað f. nokkrum árum að reyna bara að hugsa sem svo að þetta væri ofurvenjulegur dagur.
Búin að fá dvd frá Birnu Rún og Stjána (örugglega svaka fín mynd -takk fyrir hana:) og rosa fínan blómvönd og sæta "ástin mín" bók frá Bubba. Reyndar gaf hann mér nákvæmlega svona bók f .2 árum svo ég mun skila þessari:) En það er hugurinn sem gildir.
Hann hafði ómögulega getað fundið upp á hverju hann gæti gefið mér í afmælisgjöf svo ég bjargaði honum þetta árið og ætla bara að kaupa mér fína skó í vikunni.
En það er bara af því að ég er tiltölulega nýkomin frá DK og var ekki að reka á eftir honum hvernig gengi að finna gjöf handa mér.
Hann sleppur ekki svona vel næsta ár, því get ég lofað. Það var einmitt þetta gjafaleysi frá Bubba sem kom "næstum" því hinu árlega afmælis-táraflóði af stað, en ég stappaði í mig stálinu og minnti mig á að ég er orðin stór og þarf ekki að væla þó að ég fái ekki pakka um leið og ég vakna.

Danmerkurferðin gekk bara nokkuð vel. Er loksins að jafna mig í skrokknum eftir allt labbið. Anna er náttúrulega orðin alveg þrælvanur labbari og var að stinga mig af með barnavagninn.
Fólk þarna labbar bara það sem það þarf, í strætó og annað. Þannig að ég skjögti með. Og ég meina sko skjögti. Bæjarferðirnar voru svo hrikalega erfiðar að ég vældi næstum því strax eftir fyrsta hálftímann. Var að drepast í vinstri fætinum út af þessari "taug" sem lætur mér vera illt frá fætinum upp í bak og mjöðm. haltra eins og ....ja- haltra bara:) Langaði rosalega að hafa staf eða göngugrind. Það hefði bjargað einhverju.
En ég keypti soldið af barnafötum, samt ekkert mikið þar sem ég fékk alveg helling af svona grunnfatnaði frá Önnu.
Fann líka æðislega óléttuföt, er sérstaklega hrifin af 2 bolum/peysu sem eru með svona ská sniði yfir brjóstin og ég get seinna meir tekið frá öðru brjóstinu í einu og þannig gefið brjóst án þess að þurfa að rífa allt upp um mig. Algjör snilld ef maður er einhversstaðar in public.Keypti líka 2 gjafa-haldara, annar er nú næstum of lítill (var samt það stærsta í HM) hinn er voða fínn úr Change en er að drepa mig eftir smástund því saumarnir eru þvílíkir innaná honum. Skrítið að hugsa ekki út í að ganga betur frá saumum/samskeytum í svona höldurum. En ég finn ráð við því:)
Keytpi líka eitthvað á Ólöfu Jónu og Bubba. Svo allir fengu eitthvað.

Jæja, ætla að skella mér niðr´í Bónus og bakarí og versla eitthvað smá f. gestina. Pabbi og Co og mamma ætla að kíkja á eftir.
Í kvöld förum við svo á uppáhaldsstaðinn okkar, Caruso. Þar ætla ég að éta á mig gat:D og koma svo heim og horfa á nýju myndina.

p.s. skrifað seinna: fékk pott (mikil búbót) og bók frá mömmu um andleg málefni og sætan vasa úr Pier frá Leu. Frá pabba og fjölsk. fékk ég slopp því þeim þykir sá ofurmjúki og þægilegi sem ég á ljótur... en ég ætla að eiga báða, veitir ekkert af þegar ég er að fara eignast litla gubbuvél

Ekki alveg minn dagur...

Dagurinn í dag var einn sá misheppnaðasti sem sögur fara af.
Fyrsti hluturinn sem fór úrskeiðis var að það uppgötvaðist að ég hefði ekki fattað að minnka hádegispöntun á Hótel Reykholti úr 43 pers. í 29. Þetta fattaðist ekki fyrr en klst. var í matinn þannig að hótelið vill auðvitað fá matinn greiddan.
Klúður 2 fattaðist þegar ég var að fara í gegnum gamlan póst en kona frá Fosshótel hefur sent mér póst 29 maí og spurði þá hvort hópur nokkur væri staðfestur sem pantað var fyrir löngu f. jól. Þar sem ég þekkti ekki hópanafnið -aldrei séð það áður og hafði ekki vit á að biðja e-n að aðstoða mig við að finna út úr því hvaða hópur þetta væri eiginlega heimtar Fosshótel nú afbókunargjald fyrir allavega 20 herbergi sem er ansi mikið svo ekki sé meira sagt.

Mér leið svo ömurlega yfir þessu að ég ákvað að kíkja út og fór allavega með dvd-inn í viðgerð -sem var líklega það eina sem ég gerði af viti í dag. Svo ákvað ég að kaupa mér ís til að láta mér líða betur og þar sem ég er að keyra götu eina þar sem er 30 km hámarkshraði -talandi í símann -beltislaus, tek ég allt í einu eftir grænum station bíl sem tekur alla gangstéttina og um svipað leyti og ég er að átta mig á því að skottið er stútfullt af einhverju tækjdrasli blikkar rautt flass framan í mig.

Mér var allri lokið og gjörsamlega orðlaus yfir þessu.

Bubbi sagði í símanum að maður ætti eiginlega bara að taka frí og fara heim á svona dögum. En ég fór í Nóatún og keypti kassa af ís handa skrifstofunni. Reyndar var fólkið sem þurfti helst á ís-uppsleikingu að halda akkúrat ekki við. En við hin fengum okkur þá bara ís.

Eftir vinnu hef ég verið á fullu að undirbúa Köben ferðina mína á morgun. Vildi líka endilega slétta á mér harið sem tekur allt of langan tíma og vildi líka elda mat sem var nú eiginlega alveg óþarfi og allt of mikil orku-eyðsla. Special K er alveg nógu góður matur.
Er alveg uppgefin núna. Þessi bumba er farin að þyngja mig ansi mikið.

En s.s. já ég er að fara að skreppa til DK í 4 daga og hef hugsað mér að versla slatta af barnafötum og á sjálfa mig:) Eitthvað á Ólöfu Jónu og kannski eitthvað á Bubba.

Jarðarber og kartöflur. Sumarið er víst komið:)

Þá er 19. vika og 21 vika komin hérna til samanburðar. Sá skelfilegi atburður átti sér stað að nú tek ég alltaf myndir á oddatöluvikum sem mér finnst eiginlega alveg agalegt...!!! en það er af því að það gleymdist að taka mynd eina "sléttu" vikuna og þá neyðist ég til að hafa þetta á "odda" vikum til að halda 2 vikna millibilinu...

Hérna sést allavega verulegur munur:)

Erum öll að koma til eftir jarðskjálftann en þetta hafði líklega aðeins meiri áhrif á mann en maður reiknaði með í upphafi. Við Bubbi höfum verið svo gríðarlega þreytt alla vikuna og sérstaklega fyrstu dagana á eftir. Þá vorum við nú bara algjörlega örmagna, án gríns. Núna erum við bara þreytt:)

Svo er maður svo taugaveiklaður í eftirskjálftunum, kom síðast einn í gærkvöldi þegar við vorum að glápa á imbann og svo einn í morgun þar sem ég lá í leti í rúminu. Maður svona rennir augunum yfir umhverfið, hlustar og finnur hristinginn og metur hvort maður eigi að skríða undir rúm eða drífa sig út eða bara sitja rólegur og bíða þetta augnablik þangað til allt kyrrist aftur.

En á heildina litið gengur nú allt vel. Meðgangan gengur vel og ég ætla að nýta helgina í að slappa af. Er reyndar að mana mig upp í að fara að planta kartöflum úti í garði, vona að ég sé ekki of sein að gera það. Já og svo þarf nú að vökva jarðarberjaplöntuna en ég keypti svona lítið plastgróðurhús um daginn í Europris til að gefa plöntunni meira skjól og hita. Er að reyna að ná henni jafngóðri og plöntunni sem var GRAFIN burt síðasta vor þegar bannsett vinnuvél kom að gera helv. bílastæðið f. pick-uppinn v. hliðina á skúrnum. Þetta var svo góð og gróin planta, sé ennþá eftir henni. Var sko búin að stinga í kringum hana og skrapp svo upp í Garðyrkjuskóla m. Aldísi á sumardeginum fyrsta og þá komu þessir iðnu menn og grófu allt í tætlur, ég bjóst ekki við þeim fyrr en daginn eftir, hélt að allt almennilegt fólk væri í fríi:)

Skjálftamyndir og stelpan 20v. Allt á sama degi:)

Hérna eru litlar iljar.

Tolvuherbegið og búrið

Eldhúsið.Algjör myndaóreiða:)...þið þurfið sjálf að para réttan texta við myndirnar.

Nokkrar skjálftamyndir. Eldhúsið virkar nú alveg þokkalegt en bekkurinn og gólfið var nú samt þakið gleri. Skjálftinn sá svo um að loka aftur sumum skápunum á eftir sér:)

Ætla líka að setja hérna inn myndir af stelpunni okkar. Komin 21 viku í dag. Þetta styttist aldeilis. Bara 19 vikur eftir

Enn allt í rusli

Erum rétt byrjuð á tiltekt en maður snýst aðallega bara í hringi... eins og maður viti ekki alveg hvar á að byrja. Rifum allavega teppið af stofunni í dag þar sem það var stútfullt af glersalla og við tökum ekki sénsinn á að láta prinsessuna tilvonandi skríða um í glerbrotum.

Það var algjör glermulningur í því ekki séns að ná því öllu upp. Nú spyr maður sig hvernig gler getur brotnað svona á teppi....:)

jú, ástæðan fyrir því var að bókaskápurinn minn með öllu íslendingasagna-safninu innihélt líka öll spariglös heimilisins (þ.á.m. fíneríinu sem amma hefur verið að gefa okkur síðustu jól -rosalega þunn glös) og hann féll fram fyrir sig og allt brotnaði vel og vandlega í honum. Þegar við réttum svo skápinn við, opnuðust hurðarnar, (brotnuðu nú ekki nema 2 gluggar í honum) og hrúgan streymdi út í þessa líka svakalegu bóka-glerhrúgu. Þetta eru sjálfsagt 50 bækur og slatti af glösum.... ég get ekki hugsað mér að hafa smábarn skríðandi í þessu bráðum.

Fóum í mat hjá tengdó í gær og hún sýndi mér alveg hrikalega sætt sett sem hún er búin að prjóna handa barninu. Og hún sem ætlaði ekki að vita kynið þó að við ætluðum að vita það, spurði náttúrulega strax í gær um kynið... ég vissi að hún myndi gefa sig.

Fattaði hjá henni að maður er soldið klikkaður eftir skjálftann því ég gat bara einblínt á allt þessa fínu glermuni upp um allt og út um allt, og fannst algjört glapræði að hafa þetta svona allt á ystu brún nánast. úff, sá þetta allt fyrir mér í klessu. Hún er sko ekki með svona tré-stíl þannig að allt skrautið hennar færi í mola. Fólk í Reykjavík er bara í öðrum heimi fyrir mér. Hvernig getur allt farið í klessu hér en 35 km. sunnar stendur hvert einasta glersnitti. Jú hún tók nú samt eftir því að 2 myndir á vegg höfðu "eitthvað skekkst!!"

Hugsa líka hvernig umhorfs yrði hjá pabba ef það kæmi góður skjálfti þar. Fjúff maður, allt glingrið, postulíns og gler draslið sem Ólöf erfði frá mömmu sinni. Magnið er þvílíkt að það þyrfti sjálfsagt bara að taka stóra gluggann úr á annarri hæð og fá gröfu til að moka innan úr húsinu...

Jæja, ætla að koma mér inn og fá mér morgunmat. Sváfum aftur úti í camper. Allt í gleri ennþá um flest gólf inni. En í dag koma Birna Rún, Stjáni og mamma og ætla að hjálpa i tiltekt, það verður fínt:)

Þetta er mynd af skjálftavirkninni síðustu daga. Fann þenna síðasta stór í gær þvílíkt vel og var lögð af stað út úr annars nánast tómri stofunni.

Og það er stelpa:) og svo kom skjálftinn.

Þvílíkur dagur!!!
Byrjaði yndislega með sól í heiði og mér hlakkaði svo til sónarsins að ég gat ekki einbeitt mér í vinnunni.
Fór svo í sónarinn kl. 10:30 við sáum litla pjásu svo varla var um að villast:) þannig að mér er óhætt að fara að versla í bleiku.
Svo var ég bara á bleiku skýi til kl að verða 4 en þá kom þessi blessaði skjálfti. Sem betur fer var ég í bænum að vinna og fattaði ekki einu sinni strax að þetta væri svona slæmt heima.
Kallinn fór heim á undan og fékk mesta sjokkið og var búin að taka til það versta (eftir að hafa tekið vandlega myndir af öllu auðvitað fyrst)
Þetta er sko tjón upp á nokkur hundruð þúsund ef allt er talið með. sprunga utan á húsinu, fullt af munum brotið, sjónvarpið á hvolfi, með kassann beyglaðan, en það virkar þó. Tölvurnar, myndavélar, o.fl. græjudót slapp sem betur fer. Sumir skápar voru nánast tómir og margar hillur dottnar á "andlitið" og c.a. 50% af því sem brotnað gat í þeim brotnaði.
EN, við sluppum samt ótrúlega vel miðað við marga hérna. Ég get t.d. ennþá státað af heilum innréttingum og get lokað öllum skáphurðum, f. utan eldhúsbekkinn sem er ansi rispaður eftir glösin sem komu niður úr skáp.
Fólk sem við þekkjum missti næstum allt sitt og gardínunarnar héngu ekki einu sinni uppi hjá þeim!þannig að þetta hefði getað verið mun verra hjá okkur.
Er komin yfir reiðina sem helltist fyrst yfir mig, að þetta skyldi hafa endilega þurft að gerast í dag þegar ég var svona hamingjusöm með stelpuna mina
Er líka bara þakklát fyrir að hafa ekki verið heima og fengið blómapott í hausinn. Ætla sko að endurskoða þessa skrautmunahillu sem er beint f. ofan eldhúsborðið. Hef samt alltaf passað að hafa aldrei neitt f. ofan rúm eða sófa.
Og enn nötrar allt og skelfur. Maður heyrði reglulega í kvöld svona nötur þegar myndirnar á veggjunum nötruðu upp við veggina. Svo er eins og húsið sé statt á risavatnsrúmi, svona bylgjast til...
Skelli kannski inn nokkrum myndum á morgun eða þegar ég hef tíma.
Ætli helgin fari ekki í tiltekt. Ætla að reyna að fá að hætta fyrr á morgun, þarf að fara í vinnuna og klára allt fyrir einn hóp sem kemur á þri. og svo ætla ég að reyna að fá að stinga af.

Þvílíkur dagur.
Ætla að fara að sofa núna. Ætlum sko ekki að sofa inni, er komin út í camper, svo nú erum við í útilegu úti í garði, eins og reyndar margir hvergerðingar í nótt:)
Umferðin á leiðinni í bæinn í kvöld var eins og á góðum föstudegi, bara í öfuga átt...

Tékkað á kyninu á morgun:D

Er búin að bíða eftir morgundeginum ansi lengi.
Við eigum tíma kl. 10:30 á LSP í 20 vikna sónarinn og fáum að vita kynið. Ég held að það sé stelpa og svona flestir aðrir.
Sú vísindalega niðurstaða byggir á því að stelpur eru mjög ráðandi í kringum okkur, aðallega í minni fjölskyldu...
Þanngi að nú eru s.s. síðustu forvöð að giska á hvort kynið þið haldið að þetta sé:)
Þið megið endilega segja frá því í kommenti hvað þið haldið.

Bumban

2 bumbumyndir sem ég þarf að setja inn hérna svo ég geti klínt þeim inn á spjallvef sem ég er á. Ekki hægt að setja inn myndir þar nema af vefnum.

Annars finnst mér sáralítill munur á bumbunni. Á annari myndinni er ég komin 14 vikur og á hinni 17 vikur. Það er varla nokkur munur. En mér finnst hún orðin stærri núna, er að detta í 19 vkurnar á morgun.

Rétt að láta vita af mér

Ætlaði bara rétt að skrifa nokkar línur...
Það hefur verið alveg kreisí að gera síðustu daga, mamma hélt upp á 50 ára afmælið sitt í gær og það var heljar veisla heima hjá þeim. Mjög gaman og mikið drukkið, þó ekki ég:)

Meðgangan gengur súper vel og ég er farin að finna svolitlar hreyfingar. Samt er ég ekki alveg að ná þessu öllu saman ennþá, ætli ég átti mig nokkuð endanlega á þessu fyrr en krakkinn verður kominn í fangið á mér...?
Það styttist í 20 vikna sónarinn og þá ætlum við eins og fyrr segir að fá að vita kynið.
-Spennandi!!

Nýja vinnan gengur vel, alveg fullt af nýju að læra og á föstud. hætti stelpan sem ég tek við af, þannig að hér eftir er ég ein á báti með amerísku og norrænu hópana... soldið skerí tilhugsun en þetta reddast. Það versta er að f. helgi var e-mailinu sem ég hef notað í 3 vikur lokað (og þar með lokaðist ég frá öllum þeim sem ég á í samskiptum við- ekki hentugt, þar sem vinnan gengur út á netsamskipti...) Ég átti nefnilega að fá mitt eigið e-mail loksins, en það virkar ekki enn og ég hef s.s. ekki lengur þetta gamla. Ég gat lítið annað gert til kl. 17 á föstud. en að tína til bæklinga og föndra "welcome" skilti f. bílstjórana.
Á meðan halda hinar ýmsu ferðaskrifstofur um heim allann að ég sé bara ekkert að nenna að svara þeim.
Ég geri e-ð drastískt á morgun ef þetta verður ekki komið í lag.

p.s. Bubbi hefur gert okkur að meðlimum nr. 454 í hinu virta félagi: "Húsbílafélaginu" um daginn.
Hann datt í það þar sem við vorum stödd í útilegu með þeim upp í Hvalfirði um daginn og á meðan ég svaf áhyggjulaus, vitandi það að hann gæti sko engum peningum eytt á svæðinu þar sem enginn var barinn né nokkur tækifæri til fjárútláta, tókst honum að eyða 4000 kr. í meðlimagjald félagsins. Við höfum fengið senda límmiða og svona hvíta tölustafi til að líma í framrúðuna... úff, hvað við erum orðin gömul.

Fyrsta "útilega" ársins:)

Sóttum camperinn sem kom mjög vel undan vetri 1. maí og erum að fara að kíkja í fyrstu ferð ársins.

Ólöf Jóna er búin að vera að rifna úr spenninga að komast af stað en hún kom með að sækja hann á fimmtud. og hefur beðið eftir brottför stíft síðan þá.

Veit nú ekki hvort við verðum eins dugleg að ferðast í ár og síðasta sumar. Þá fórum við hverju einustu helgi (og ég lýg því ekki:) þar til um verslunarmannahelgina, eftir það fórum við einu sinni á einhverja daga í Þorlákshöfn í lok ágúst og svo fór hýsið í geymslu.
Stefnan er tekin eitthvað austur.

Annars er það líka að frétta að ég er komin í nýju vinnuna og líkar mjög vel. hef verið að leysa ýmis verkefni f. hinar stelpurnar á skrifstofunni og það hefur verið mjög lærdómsríkt. Hef t.d. lært að: gera aksturskýrslur f. bílstjórana, vouchera, leiðarlýsingu f. leiðsögumennina og ýmsar nýjar skammstafanir:)

Það er auðvitað eitt challenge þarna en það vinnur þarna sjálfstæðismaður sem finnst ekki mikið til kennarastéttarinnar koma... Við erum samt orðin ágætis vinir;)