tímaeyðsla

Hver hefði trúað þessu?!


You scored as Dance.
You should be a Dance major! Like a lithe ballerina, you dance because you believe there is beauty in expressing the physical form.

Dance
100%
Linguistics
67%
Biology
67%
Philosophy
67%
Psychology
67%
Sociology
67%
Mathematics
58%
Journalism
58%
Art
58%
Anthropology
50%
Theater
42%
English
42%
Engineering
33%
Chemistry
0%
RATE ME!!<3)created with QuizFarm.com";

Ég virðist hafa of mikinn tíma í lífinu....

klukk

Anna klukkaði mig á sinni síðu þannig að nú svara ég þessum ósköpum.
:)
jæja:
4 matarkyns sem ég held uppá.
-Fajitas pönnukökur með öllu draslinu. Helst svo troðin að ég get engan veginn lokað henni.
-Jólamaturinn í Kjarrbergi 3- svíkur engan
-Hvítlauks matreiddir humrar eins og ég lifði mikið á í Vestmannaeyjum.
-Og auðvitað Kentucky, pítan, Stællinn og allir hinir vinir mínir.

4 staðir sem ég hef unnið á.
-Flokkunarsorpstöðin Gámur -sem brann svo við hliðina á Straumsvík.
-10-11 í allt of mörg ár.
-Elliheimilið (De gamles hjem) í Haslev í DK.
-Hótel Laugarvatn í eldhúsinu.

4 bíómyndir sem ég get horft á aftur og aftur.
-Shawshank Redemption. Mögnuð mynd.
-Forrest Gump. Tónlistin er æði
-Friends, ef það væri bíómynd gæti ég örugglega horft oft á hana.
-Sódóma, er kannski farin að stela frá þér Anna... En Sódómu getur maður alltaf kíkt á og skoðað Palla-sjoppu og hvað staðarhættir breytast.- þetta fer að hafa sögulegt gildi.

4 staðir sem ég hef heimsótt í fríi.
-Barcelona á Spáni
-París í Frakklandi
-Færeyjar- hinar ýmsu eyjar sem var hægt að keyra yfir á
-Kaupmannahöfn, oftar en ég man.

4 sjónvarpsþættir sem falla mér í geð.
-Desperate housewifes- þar eru allir svo dásamlega klikkaðir en þó ekki...
-Lost, ef sería 2 er ekki að leysast upp í vitleysu.
-Friends.
-Malcolm in the middle, House, ...

4 staðir sem ég vildi helst vera á núna.
-Á ferð með Bubba í húsbílnum.
-Í heimsókn hjá Helle eða Önnu í DK.
-fyrir framan sjónvarpið í lazy-boy-inum
-í rúminu með dvd í tölvunni.

4 síður sem ég skoða oft -ekki blogg
þá versnar í því þar sem bloggið hefur nánast tekið völdin.

-dýraland.is að skoða hina sætu voffana
-mbl.is -veðrið og fleira.
-sph.is -huga að fjármálunum- alltaf að tékka á stöðunni:)
-barnaland- að skoða einhver börn

4 bækur sem ég hef lesið oft.
-Hús andanna -heil veröld út af fyrir sig.
-Litla mamma -gömul bók sem amma á Kópaskeri átti.
-Ísfólksbækurnar voru lesnar upp til agna í denn.
-Litla svarta kisa.- alltaf jafn spennandi og full af endurtekningum.

Jæja, þetta gekk barasta vel.
Nú klukka ég Aldísi og Birnu Rún, veit að þær lesa bloggið mitt og því nappa ég þær:)
Gangi ykkur vel- þetta er ekki eins erfitt og það lítur út fyrir.

Ég lét fylgja með 1 sæta mynd af Óliver en dýrin eru næstum þau einu sem ég hef hér inni á vinnutölvunni minni
afsakanir-afsakanir:)

Furðufuglar Hveragerðis

Í dag er kominn miðvikudagur og ég er rétt að jafna mig eftir helgina.
Það mætti múgur og margmenni í innflutningspartýið og örugglega verið hátt í 20 manns þegar hæst stóð. Ég fékk fullt af flottum og fínum innflutningsgjöfum, t.d glös, útikerta-lugt, frumlegan blómavönd og síðast en ekki síst, litla sæta belju handryksugu. Ég þarf að flytja mikið oftar....
Við kíktum á Snúllabar (ég veit, hverjum dettur annað eins nafn í hug?) og svo var farið heim og svo í partý og svo aftur heim...
Það merkilegasta við þetta var að um nóttina fylgdi okkur drengur sem allir héldu að væri vinur einhvers annars, eftir miklar upprifjanir munum við að hann var á barnum og slóst svo í för með hópnum. Ég nánast henti honum svo út um morgunin eftir að hann var farin að pirra mig mikið. Bubbi skrönglaðist svo fram einhverntíma eftir hádegi og þurfti aftur að henda sama manninum út þar sem hann var bara búin að koma sér fyrir í stofunni og farin að glamra á gítar!
Það er ekki í lagi með fólk. Ég passa mig allavega að læsa öllu vel núna því þessi furðufugl er nú búin að skanna út allar okkar eignir og ég vona að hann hafi ekki náð því að Bubbi væri úti á landi að vinna þessa dagana.

Sunnudeginum eyddum við skötuhjúin svo í óhemju þynnku eftir að hafa kvatt síðustu gestina (sumir gistu og sonna) og fórum í pottinn og höfðum það huggulegt.

Finnlands-kennara-ferðin er næstu helgi og það verður örugglega æðisleg ferð. Með henni fylgir vetrarfríið og hækkandi sól.

Hafa fleiri en ég tekið eftir því að það hefur verið sól í heila 2 daga í röð. Mikið er það dásamlegt.

innflutnings-partý

Jæja, loxins bloggar maður.
Það er svona að vera netlaus og vitlaus í Hveragerði. Það gengur hægt en örugglega að koma okkur fyrir í slotinu. Eldhúsið er orðið fínt og sömuleiðis stóra baðherbergið. Stofan er öll að koma til og hjónaherbegið líka, sem og herbegið hennar Ólafar Jónu. Það lá nú við slagsmálum (ýki nú aðeins kannski) þegar það var málað þar sem við Bubbi gátum ekki komið okkur saman um litinn sem átti að prýða værelsið. Ég vildi tyggjóbleikt upp undir loft, en hann vildi tvískipta því -bleikt neðri hlutinn en blátt eftri hlutinn. Hann vann!!! Það kann bara ekki góðri lukku að stýra þegar gröfumenn og fautar fara að skipta sér af litavali!!
Mér gengur eitthvað hálfilla að leyfa öðrum en mér sjálfri að skipta sér að uppröðun, málningu og fl. Ég vil einfaldlega stjórna þessu öllu. Er þetta frekja eða bara vantraust á smekk annara (aðallega smekkur Bubba)? Ef hann fengi að ráða væru húsgögn fyrir öllum gluggum og þau væru líka flokkuð. T.d yrði einn veggurinn í stofunni bara þakin hillum, Lazy-boyinn yrði til frambúðar fyrir aðalglugganum og reykt yrði inn um allt. Þá væri líka hægt að tilgreina staðsetningar betur, "Bókin en einhversstaðar á hilluveggnum" eða "það er óþarfi að draga fyrir, við höfum bara fín húsgögn fyrir helvítis birtunni"

Um helgina verður innflutningspartý og ef þér sem Þetta lest hefur ekki verið boðið hef ég annaðhort gleymt því eða þá að þér er alls ekki boðið ("þér er ekki boðið" -lag-Rottwiler)
Líklegra þykir mér þó að ég hafi bara gleymt að bjóða þér og er þér velkomið að hringja í mig og boða þig og þína.
sími 699-4001 og 483-4976 Maður er sko kominn með sveita númer og alles.

En nú er mál að linni. Er á leið í heimsókn til Diddu frænku en ég vogaði mér að flytja án þess að kveðja hana. Henni finnst að ég sé flutt á hjara veraldar og það minnsta hefði verið að kveðja áður. Ég skammast mín og fer nú þangað í heimsókn.

krossleggja fingur

Í gær fór ég í atvinnuviðtal í Grunnskóla í Hveragerði. Og viti menn, ef e-ð losnar mun það líklega vera 100 % myndlistarstaða!!! Hverjar eru líkurnar?
Ég óska einskis heitar en að verða myndlistarkennari sem passar einmitt við þessa menntun sem ég fékk mér. En nú er ég í smá vanda þar sem ég þori ekki öðru en að sækja um í öðrum skólum í nágrannabyggðarlögum ef vera kynni að ég fái þetta ekki...
Best væri samt bara að vinna í sama bæ og ég bý í.

jæja, þá er eftir engu að bíða -helgi (weekend sko) hér kem ég

Miðvikudagur.

úff, svaf yfir mig í morgun. Þetta hefst upp úr því að vaka langt fram á nætur öll kvöld. Í kvöld SKAL ég fara snemma í rúmið.
Birna Rún og Lea kíktu í gærkvöldi og komu skjálfandi á beinunum af taugastrekkingi inn til mín eftir að hafa keyrt í svartaþoku. Til að sitja ekki uppi með þær þurftum við svo að keyra þær hálfa leið til baka aftur :þ
Maður er strax orðin voða vanur að keyra á heiðinni og mér þykir þetta mikið minna mál eftir að ég flutti.
Skrepp í hádeginu og leigi út íbúðina á Tjarnarbrautinni. Vona að þetta gangi allt saman upp, það væri verra ef í ljós kæmi að leigjendurnir væru t.d sóðar eða ruddar eða e-ð þaðan af verra...

p.s. við erum komin með dísel bíl og nú þarf maður ekki að fá í magann yfir bensíneyðslunni. Það þykir mér mikil búbót

mánudagur...

Gistum fyrstu helgina í nýja húsinu. Það var bara frábært. Ég gæti hugsað mér að vera bara þarna í heila viku og geta snúist og raðað án truflana. En við þurftum víst að mæta í vinnu í morgun- eins og ég hafi e-n tíma fyrir svoleiðis.
Uppþvottavélin stóðst undir væntingum og dýrin eru að venjast þessu öllu saman.
Byrjuðum að mála í gær og byrjuðum á mikilvægasta herberginu- svefnherberginu. Þetta er allt svo frábært að við erum langt frá því að vera komin niður á jörðina og svífum ennþá um.
Það verður samt ágætt að komast aftur í rútínuna.
Það gekk fínt að keyra svo í bæinn í morgun en svolítið erfitt að vakna. Þessa dagana stjákla ég um húsið langt fram á nætur og raða í hillur og dúlla mér.

Innflutningspartýið hefur verið áætlað 11. febrúar nk. á laugardegi og er það vel. Hlakka til og vona að ég verði búin að koma okkur vel fyrir. Hef þá allavega e-ð að stefna að.
Aldís er búin að panta gestaherbergið en það er enn laust í herbergið hennnar Ólafar Jónu :p

Jæja, nenn,eggi,meir. Best að fara með börnunum í hengimann.

Kann ekki alveg að snúa henni en þetta er líka bara svona til skemmtunar. Svona lét hann vaða yfir sig daglangt kötturinn
Ætla svo að fara að setja inn myndir af öðru en Ólöfu Jónu og dýrunum:)

Jæja, þá er allt komið í höfn með húsið í Hveragerði og ég er búin að kaupa mér fínan gálgafrest fram í maí en þá fer síðasta greiðsla fram í afsalinu. Við fórum eina draslferð í fyrrakvöld og ég byrjaði aðeins að raða í skápa í fína fína eldhúsinu mínu. Okkur hlakkar alveg ofboðslega til að flytja þangað en ég vil helst ekki flytja þangað ein, Bubbi er mikið úti á landi að vinna þessa dagana og mig langar að bíða með að alflytja þangað til hann getur komið með.
Við ætlum að mála stofuna og 2 svefnherbergi til að byrja með. Svo ætti bara allt að vera tilbúið. Og þá geta allir farið í pottinn:)

Bubbi er víðsfjarri og hefur varla tíma til að standa í þessum flutningum. Hann er núna að vinna við Jökulsárlón sem standby-kafari ef bílaauglýsingin færi illa og Volkswagninn skyldi hrynja niður í vök. Þetta er agalega spennandi allt saman. Þyrlur og sexhjól þeysast í kringum þessa splunkunýju og háleynilegu útgáfu af Folla. Eftir tökur í gær var svo farið með allann mannskapinn á hótel Skaftafell í gistingu (þar mátti m.a sjá þyrluna barasta parkeraða fyrir utan) og þar átu allir og drukku á kostnað hins þýska fyrirtækis. Já, þeir sletta skyrinu sem eiga það.
Í dag eiga svo einhverjir 3-4 toppar frá Volkswagen að koma austur og fá að fylgjast með tökum sem eru í raun bara show-off, þar sem allar aðaltökur eru búnar en þeir eiga að fá að fylgjast með bílnum keyra á ísnum og svona.

Það er ekki laust við að maður eigi eftir að sakna prestannna og sona þeirra af efstu hæðinni á Tjarnarbrautinni. Í gær stóð prestlingurinn og fylgdist með mér leggja og setti svo aðeins út á það... Ég skil ekkert í því en þetta er eini maðurinn sem Díkó urrar voðalega á. Venjulega flaðrar hann bara og sleikir allt og alla. Ég þorði ekki að hleypa hundinum úr bílnum fyrr en presturinn var farinn. Díkó væri líklega ekki í þjóðkirkjunni þó það væri í boði.

Jæja, er farin í kaffi. Vonandi er eitthvað nammi í boði uppi á kaffistofu.

p.s Bubbi tók mynd af bílnum á símann sinn í gær (þeir sem standa að þessu fullyrða að engin mynd sé af honum á netinu- slíkt er öryggið) og getur selt hana á netið fyrir nokkra hundraðþúsundkalla- myndin er til sölu fyrir rétta aðila!:p

veruleika-tékk

Þetta er tekið á nýársdag í bíltúr. Tek fram að aumingja Díkó fékk smárest af þessari gómsætu rækjusamloku.

Í gær fórum við mamma og Birna Rún austur í Hveragerði að undirrita kaupsamninginn. Eftir ótrúlega langan fund þar sem lopinn virtist vera teygður út í hið óendanlega vegna hita og upplesturs á hverju einasta °#*x!$ orði á öllum blöðum -kom sjokkið! Í ljós kom að ég átti að borga 700 þúsund meira en ég hafði svona áætlað. Hún hafði ekki talað fyrr um þessar tölur sem hún slengdi fram svona í lokin-ok, hún minntist á prósentur af láninu en ég stóð í þeirri meiningu að því væri dreift á greiðslur á láninu en ekki borgað strax! Enda veit ég ekkert alltof mikið um fasteignaviðskipti. En ég nenni ekki að fara út í þetta allt aftur þar sem það eyðileggur ánægju mína af þessum viðskiptum.
Ég ætla samt að hringja á mánudagsmorgun í Félag fasteignasala og fá útskýringar á því sem ég skil ekki. Þetta ætti samt allt að "reddast" eins og oft vill verða um hluti.

Í dag fór ég aftur á móti austur með bílfarm af kössum og Ólöfu Jónu heldur bjartsýnni en í gær. Við höfum haft afar huggulega helgi 2 einar þar sem Bubbi er aftur farin vestur á Bíldudal að vinna. Það var mjög gaman að kíkja austur og byrja að bera inn svolítið og undirbúa málningarvinnuna. Mér fannst þetta samt hálfskrítin tilfinning, að ég "ætti" þetta alltsaman. Ég fékk næstum því víðáttubrjálæði.
Ég er semsagt búin að jafna mig á þessu reality-check-i sem skall á okkur í gær og er nú bara afar hamingjusöm með kaupin.

Haha, Bubba og Árna Kóps var meinaður aðgangur að Þorrablóti Patreksfirðinga, nú rétt í þessu vegna ófullnægjandi klæðaburðar en þeir pökkuðu ekki jakkafötunum þegar þeir fóru vestur að vinna. Hef samt engar áhyggjur af því að hann láti ekki rætast úr kvöldinu.

Jæja, best að halda áfram að fylgjast með æsispennandi úrslitum Eurovision undanúrslitin. Þvílík lög maður!

2. tilraun

Ætla að gera aðra tilraun til að blogga. Varð svo fúl í gærdag þegar ég missti allt út sem ég hafði bloggað (af annars fínu bloggi) að ég nennti ekki að skrifa allt aftur.

Helstu fréttir eru þær að nú er allt komið í gegn í sambandi við íbúðina. Ég meina HÚSIÐ! Ég hringdi meira að segja í gær í fasteignasöluna til að ath. hvort öll gögn hefðu ekki verið föxuð frá bankanum avo hægt væri að útbúa kaupsamninginn en sú síðasta sem ég ræddi við í sph í gær hélt því fram að þetta þyrfti að sækjast, undirskrifast og þinglýsast áður en lengra væri haldið! Þvert á það sem aðrir höfðu sagt. En sparisjóðsmenn stóðu sig með prýði að vanda og allt skilaði sér austur. Við förum svo austur á fim, -föstud. og skrifum undir þannig að ég verð kannski bara að flytja um helgina:) Og ég vona að Bubbi verði ekki farinn vestur að vinna.

Ég setti íbúðina á Tjarnarbrautinni á leigu í gær í Fjarðarpóstinum. Ég er ansi svartsýn á að hún seljist. Birna Rún er að byrja að leita og sló inn þessum leitarskilyrðum ca. 7-17 milljónir og fékk um 500 eignir. Ég sló inn 7-20 milljónir og fékk tæplega 800 eignir og Tjarnarbrautin nýtur ekki þeirra forréttinda að vera framarlega í stafrófinu. Maður gefst vanalega upp í e-f.
Afhverju ætti fólk líka að kaupa íbúð í gömlu húsi sem þarfnast viðgerða þegar það getur fengið nýtt. Það er þvílíkt offramboð á húsnæði og ég segi nú bara eins og Didda frænka: "Hvaðan kemur allt þetta fólk sem á að flytja í öll þessi nýbyggðu hús"

Síðasta helgi var fín, eyddum laugardeginum uppi á Hellisheiði þar sem ég fékk að spreyta mig mestan part dags. Var nú ekkert að æða í einhverjar torfærur og gat líka alltaf stoppað nákvæmlega þar sem ég vildi taka mynd. Bubbi er ekki svo innstilltur inn á það. Honum fannst þetta heldur ekki mjög fjörugur túr. Um kvöldið fórum við svo seint og um síðir upp í Hrauneyjar til þess eins að detta í það í sjónvarpsherberginu þar. Keyrðum svo heim um leið og við vöknuðum seinnipartinn á sunnudeginum! Stutt en öflug ferð.

Jæja, ætla að fara í kaffi.
Bless í bili

Home alone

Þá er Bubbi farinn vestur að grafa vatnsholur á Tálknafirði. Hann er alsæll með þetta og mér finnst hann líka velja besta tímann (eða þannig) til að fara út á land að vinna eða í sömu viku og við erum að byrja að pakka innbúinu! Hann er séður drengurinn.

Ég fór í 75 ára afmælisveislu í gær til Helgu ömmu. Hún er alltaf svo hress, svona ætla ég að líta út þegar ég verð svona gömul. Það var fínt að hitta ættingja og spjalla. Með pabba og co kom nýi fjölskyldumeðlimurinn hún Stubba sem er ...e-r tegund sem ég man ekki.. og heyrði ég gott nikk-name á honum :Hillu-hundur. Svo fuku nokkrir töskubrandarar og svona :) Ætli sé ekki best að fara með Díkó (okkar hund) í heimsókn til pabba til að leyfa honum að þefa af kvikindinu. Mér finnst þetta nú varla hundur en hann er samt voða sætur greyjið.

Við erum enn að bíða eftir samþykki íbúðalánasjóðs fyrir láninu en hef engar áhyggjur- þetta á eftir að koma í gegn. Þannig að ég fæ kannski bara afhent í kringum næstu helgi. Það mun reyndar verða vandamál að reka 2 íbúðir en Tjarnarbrautin þarf að fara að seljast.

Kíkti á útsölurnar í gær og fann pils og stuttar buxur við fínu dýru stígvélin mín sem ég fer helst ekki úr. Þetta eru sko almennieg gellu-stígvél úr uppáhalds-skóbúðinni minni: Bossanova.

Fór á ættarmót á sunnudaginn í Rafveituhúsinu upp í Elliðaárdal. Það væri svosem ekki í frásögur færandi nema það að ég áttaði mig á hvílíkir hávaðabelgir þessir ættingjar mínir voru. Það var hver sjálfum sér næstur að komast að og frá kökuborðinu og svo þurfti að sækja drykki! Þetta var ægilegt fjör og ég heilsaði fullt af fólki sem ég þekki ekki svo gjörla...

Jæja, best að fara að vinna eitthvað

einu skrefi nær

Í dag fórum við austur í Hveragerði og undirrituðum kaupsamning sem er samt með fyrirvara um að við stöndumst greiðslumat en við höfum reiknað okkur sjálf fram og tilbaka inni á íbúðalánasjóði.is og teljum okkur alveg vera manneskjur í þetta.
Fórum svo að skoða húsið aftur og mældum aðeins og svona.
Við erum alveg í skýjunum yfir þessu og fáum líklega afhent í vikunni þannig að maður ætti eiginlega að vera á fullu að pakka en ég er nú aðeins byrjuð á jólaskrautinu.

Ólöf Jóna er hjá okkur núna og sér alveg um að halda stráka-kisunni honum Óliver uppteknum. Það er alveg ótrúlegt hveð kötturinn leyfir henni að tuskast með sig. Þetta er reyndar mynd af Snældu í "fanginu" á Ólöfu Jónu en hún er ekki alveg eins viljug að láta dröslast með sig eins og Óliver. Ég á nokkrar svona myndir og þær eru alveg drepfyndnar.

Fyrir þá sem langar að sjá myndir af tilvonandi einbýlishúsinu okkar bendi ég á http://mbl.is/mm/fasteignir/leit.html?fermetrar_fra=&fermetrar_til=&herbergi_fra=&herbergi_til=&verd_fra=&verd_til=&gata=Borgarhraun&lysing==
Þetta hefði kannski ekki þurft að vera svona langur linkur en....

Jæja, segið mér hvað ykkur finnst og kommentið nú.

allt að gerast.

Gleðileg nýtt ár og allt það....
Nú er allt að gerast skal ég segja ykkur.
Íbúðin mín er semsagt á sölu og 1 búin að koma og skoða. Við erum búin að gera tilboð- með fyrirvara um að íbúðin okkar seljist- í Borgarhraunið í Hveragerði en það er það eina sem okkur langar í þarna. Tókum skoðunarátak austan heiða á milli jóla og nýárs og leist ekki á neitt annað.
Hugsa samt að við höfum boðið of lítið í það en við buðum bara 23 millj. en einmitt á sama tíma voru einhverjir aðrir að bjóða í þetta líka eftir tíðindaleysi langa lengi- týpískt. En við buðum svona lágt því við reiknuðum með að þau kæmu með móttilboð. Hvernig svo sem þetta fer vona ég bara að ÉG fái húsnæðið, það er fyrir öllu og ég vona að fasteignasalan þarna fyrir austan átti sig á því.

Á morgun er ég að fara til læknis og það er svosem ekkert leyndó, en við Bubbi viljum endilega fara að fjölga okkur (við myndum auðvitað framleiða fallegustu börnin:) og það hefur ekki alveg gengið sem skyldi þannig að nú er bara verið að fara í allsherjartékk og vonast ég til að fá svör fljótlega því ekki yngist maður...

Vinnan er byrjuð og börnin eru voðalega stillt og góð svona á heildina litið. Í gær var fyrsti skóladagurinn og þau voru svo þreytt að þau héldu varla höfði -sem var alveg ágætt.
Sjálf er maður rétt að komast í gang og reyndar er ágætt að fá rútínuna aftur. Hlakka líka til að byrja aftur á myndlistarnámskeiðinu og halda áfram að mála.

Já og lokaúrslitin eru komin úr jólagjafaleiknum.
Birna Rún 100 stig, Mamma 90 stig, Bjöggi frændi 70 stig, Aldís systir hans 80 stig (gef þér 10 aukastig vegna snúinna spurninga og vegna þess að ég er góðhjörtuð) og Anna vinkona fékk 70 stig.
Til hamingju öll sömul þið fáið allavega jólakort.

Heyrumst síðar.

Jólagjafalistinn 2006

Nú var ég að prófa að setja inn mynd með blogginu, sé ekki hvort það heppnaðist. En ef myndin kom að þá er hún af Ólöfu Jónu og er tekin á menningardag/nótt í Reykjavík. Þetta er tekið inni í skartgripaverslun sem tyrfði gólfið með fyrsta flokks grasþökumog baldursbrám. Ég myndaði villt og galið þarna og á meðan byrjaði Ólöf Jóna auðvitað að tína fínu blómin, en ekki hvað? Ég þurfti að "endurplanta" blómunum!
En flott útstilling, finnst ykkur ekki?


Þá er að komast mynd á þetta,3 hafa þreytt prófið og fengu þau eftirfarandi: Birna Rún 100 stig (af 100 mögulegum), Aldís og Bjöggi fengu bæði 70 stig. Ég bætti 10 stigum á Birnu Rún og Aldísi en svarmöguleikinn er rangur í spurningunni um dýraeignina. Bjöggi fékk engin 10 aukastig, hann svaraði því hvorteðer rangt.
Niðurstaðan er því sú að Birna Rún fær glæsilegustu jólagjöfina næsta ár.
Spurning hvað hinir fá! Mikið er þetta skemmtilegur leikur.

En að öðru. Fórum út að borða á Lækjarbrekku í boði Diddu frænku í gær. Hún býður alltaf til árlegrar veislu á afmælinu sínu. Þetta var ægilega fínt og flott alltsaman. Ég fékk mér svona þrírétta matseðil og byrjaði á rjómalagaðri humarsúpu og svo komu hvítlkauks-grillaðir humrar - afar ljúffengt. Í eftirrétt var svo ís. Bubbi fékk aftur á móti miklu betri forrétt en ég en vildi samt ekki skipta og var snöggur að éta hann allann áður en ég komst í hann. Þetta var samt ægilega gott og ég svaf til hádegis í dag enn á meltunni.

Já og fréttir: Ég er búin að setja íbúðina mína á sölu og er hún metin á 13,8 millur, sem er 6 milljónum meira en ég keypti hana á. En við ætlum hvort sem er í stærra þannig að það hrekkur skammt. Þið getið skoðað auglýsinguna á mbl undir tjarnarbraut- 13,8 millj. en íbúðin uppi er líka til sölu á litlar 34 millur!
Við stefnum á Hveragerði og erum með augastað á húsi sem hefur yndislega elhúsinnréttingu, 60 fm. girtum palli, tvöf. bílskúr, fínum garði og síðast en ekki síst, heitum potti! Á 27,4 millj.
Hugsið ykkur partíin sem væri hægt að halda!
Þetta er allt í athugun ennþá en það er gaman að láta sig dreyma.


Jæja, nú er nóg komið- munið eftir prófinu, ég er svo spennt að sjá niðurstöðurnar

P.s. hvað á að gera um áramótin? Við ætluðum í bústað en hann kostaði 30 þús!!! Ætli endi ekki bara með almenilegu partíi hér heima!

linkprufa

ok, er að prófa svona nýjung, ætla að athuga hvort ég kunni að búa til link. Here goes: http://kvikmynd.is/
Þetta er e-r auglýsing.

Blessuð jólin eru í hámarki sínu og afhverju eru þá svona lélégar myndir í sjónvarpinu?
Jólin í gær voru aldeilis fín, átum hjá mömmu og komum með okkar eigin hamborgarhrygg eftir yfirlýsingar þess efnis að það væri betra að eiga afganga heldur en ekki og þar fram eftir götunum. Fékk fullt af flottum gjöfum og kann ég þeim sem gáfu mér þær, bestu þakkir fyrir- þeir taki til sín, sem við á.

Erum búin að ná að halda áætlun í dag enda rak ég liðið áfram harðri hendi. Fyrst var það að sækja Ólöfu Jónu upp í Mosó og fara heim og opna þá pakka til Ó.J sem hún fær frá Pabba síns fjölskyldu og aðeins frá minni...
Svo var lagt af stað í förina miklu. Fyrst var farið til Sigrúnar systur Bubba, en dóttir hennar var 4 ára og þær Ólöf Jóna miklar vinkonur. Þau halda ekki jól því þau eru múslimar svo þetta er svolítið öðruvísi en gengur á flestum heimilum þessa dagana. Fínt að hafa afmæli bara í staðinn= 1 dags hátíðarhöld
Þvínæst fórum við til mömmu Bubba, eða ömmu Brendu... Ekki að hún brenni allt, heldur heitir hún semsagt Brenda. Amma Brenda hljómar samt stundum fyndið!
Eftir mikið hangikjötsát fórum við svo aftur í hangikjöt hjá föður mínum og eins og ég segi: í meira hangikjöt. Nú er hangikjöt auðvitað herramannsmatur, en öllu má nú ofgera. Án þess að ég vilji hljóma vanþakklátt.

Hef það annars dásamlegt núna, er komin heim og við eigum til haug af óhorfðum dvd-myndum og gnægð af konfekti ýmis konar.

Jæja, svona í lokin, ákvað að prófa að búa svona til og leyfa ykkur að spreyta ykkur þar sem ég veit að þið hafið ekkert betra að gera svona í jólafríinu.
Ykkur mun svo verða raðað í röð, ekki handahófskennt, á vinsældalistanum mínum eftir frammistöðu prófsins. Framtíðarjólagjafir verða svo í samræmi við það. Góða skemmtun
http://www.quizyourfriends.com/yourquiz.php?quizname=051225184349-484547

Blessuð jólin nálgast

2 dagar til jóla og allt virðist ætla að ganga upp. Eins og það gerir reyndar alltaf.
Er reyndar ekki búin að vera neitt jólastressuð að ráði nema í gær, hluta úr degi. Ég var semsagt að kaupa jólaskó á Ólöfu Jónu og hefði ekki ætlað að það væri mikið mál! En það var öðru nær. Skórnir á höfuðborgarsvæðinu voru einfaldlega búnir. Allavega allir hvítir og ljósbleikir. Endaði niður á Laugavegi í barnafataverslun og keypti þar skó sem ég var ekki einu sinni sátt með! En ákvað bara að láta staðar numið þarna.

Í gærkvöldi rúntuðum við austur í Hveragerði skoðuðum hús þar. Reyndar ekki innandyra þar sem fólkið er flutt úr húsinu, en kíktum á alla glugga og þetta er draumahúsnæðið.
En nú er bara að leyfa jólunum að líða og fara svo að ath. hvort maður sé lánshæfur fyrir ósköpunum. Það væri óneitanlega gaman ef þetta yrði hægt:)
Það er pottur úti á pallinum! Þarf að segja meira?

Á leiðinni heim fundum við okkur jólatré sem stóð bara þarna og bað um að láta saga sig. Þetta var hvort eð var á landi sem verður komið undir malbik eftir áratug.
Semsagt góður rúntur til vonandi framtíðarheimilisins og arðbær upp á jólatréð að gera.

Jæja, best að fara pakka inn jólagjöfum.
Það þýðir ekki að slá slöku við þessa síðustu daga...

Eruð þið orðin full eftirvæntingar yfir jólunum?

Ofurhúsmóðir

Jæja, þá er maður allur að hressast eftir langvinn veikindi:p
Í gær fórum við Bubbi í bæinn og það hefur hvílt eins og mara á okkur að upplifa þessa ferð. Ég þoli auðvitað búðarhangs en það sama er ekki hægt að segja um Bubba.(þó ég hafi reyndar mikla ímugust á Kringlunni/Smáralind) Ég uppgötvaði leynitrikk sem nota má á mennina þegar jólainnkaupaferð er þeim orðin óumflýjanleg. Það er óhætt að segja að þetta trikk verði notað um ókomin ár. Galdurinn felst m.a. í því að minna skipulega á yfirvofandi bæjarferð í heila viku. Svo þarf að útbúa hnitmiðaðan lista yfir það sem vantar svo enginn tími fari í óþarfa-vafur eða snöfl í verzlunum, og fara nokkrum sinnum yfir hann.
Svo rann laugardagurinn upp, þ.e. gærdagurinn.
Við fórum í 2-3 búðir og svo ætluðum við á kaffihúsið á 2. hæð í Smáralindinni. Þar var brjálað að gera svo við skutluðum okkur inn á Fridays og nú kemur töfralausnin: að gefa manninum bara Carlsberg bjór. Og það sem gerði gæfumuninn var aukaflaskan! Ég skal sko segja ykkur það að innkaupin gengu framar öllum vonum. Á tímabili hélt ég að hann væri orðin ofjarl minn í þessu, þar sem ég var alveg að gefast upp á þessu búðarrápi. En ég kvartaði sko ekki!
Komum heim eftir 5 tíma ferð með 3 jólagjafir, lykla sem hafði lengi vantað, jakkaföt og ýmislegt nytsamlegt annað.
Ég vil bara benda öðrum konum á þetta sem þurfa að draga mennina í búðir: gefið þeim bara bjór og þá gengur þetta allt mikið betur. Ég meina, hann meikaði meira að segja Söstrene Grene búðina. Og geri aðrir betur.

Í gær var líka matarboð hjá Helgu Ömmu, það var mjög huggulegt og fínt. Mjög þægilegt að hittast svona á aðventunni í staðinn fyrir að fara í jólaboð einmitt á þessum dögum sem maður ætti bara að liggja heima yfir sjónvarpinu og namminu.

Í dag aftur á móti hef ég verið svakalega dugleg hérna heima. Ryksugaði allt að því hvert einasta dýrahár upp úr gólfinu- og það er mikið skal ég segja ykkur. Skúraði svo og þurrkaði af. Hengdi upp seríu og skrifaði öll jólakort. þvoði þvott og eldaði mat. Mér líður eins og ofurkonunni. Reyndar eru flestir dagar kannski ekki svo ólíkir þessum...eða svona...en undanfarið hef ég ekki áorkað miklu þannig að þetta eru viðbrigði.

Vissuð þið að það er hægt að fá appollo lakkrísafklippur á 400 kall kílóið uppi í Góu? Þessu vorum við að komast að og er þetta étið grimmt þessa dagana.

Jæja, þangað til næst.

ó mæ god

Er alveg að klikkast á heyrnarleysinu. Ég þarf að reka heilbrigða eyrað (heyri þó ekki fulla heyrn á því) að fólki og biðja það að endurtaka. Nú veit ég líka afhverju mér hefur fundist sem skólabörnin væru svona róleg í dag og í gær, ég einfaldlega heyri ekki í þeim- sem er eiginlega guðsblessun.
En á eftir ætla ég að kaupa þetta pensilín sem ég fékk recept fyrir á mánudaginn og éta það bara og vona hið besta.

Að allt öðru.
Kíkti í gær í Smáralindina þó ég hefði alls ekki heilsu til. Þar var komin ný búð sem heitir Söstrene Grene. Þvílík guðsgjöf (takið eftir hvað ég er farin að ákalla Guð mikið- það eru nú að koma jól) sem þessi búð er. Þarna ægir saman allskyns drasli og settlegasta lið myndi missa sig þarna. Þarna fann ég striga strengdan á ramma á 160 kr og annað eins með ramma á 450 kr! þetta er gefins. Ég keypti skran af bestu gerð fyrir rúmar 2000 kr. og ég get ekki beðið með að komast þarna aftur. Ég hef bara mestar áhyggjur af því að þá verði sumt búið, því þetta hlýtur að klárast....
hvað á ég að gera.
Það er gott að ég þarf ekki að pæla í vatnsskorti

Maður hefur það allt of gott